أخباركم – أخبارنا
كتب عمر حرقوص عبر صفحته للتواصل الاجتماعي فيسبوك: عمبشوف اللي كتبه أسعد أبو خليل من تحريض ضد الطبيب جورج نكد ابن دير ميماس اللي عايش بالجنوب كل عمره يشتغل طبيب الفقرا ويداوي كل الناس بدون استثناء، وكنت دايما من سنة 2007 بقول انه ما بدي رد عليه خصوصي لما كان يحرض عليّي وكيف كتب ضدي هو وبيار أبي صعب مع “أطفال جريدة الأخبار”، لتوصل ببيار يومها انه يطلق مسمى “الحرقوصيون الجدد”، بس اليوم ما عاد ينحمل واحد متل أسعد قاعد بكاليفورنيا بيدفع ضريبة بتوصل للجيش الإسرائيلي انه يهدد حياة هالطبيب وأهل ضيعته اللي منهم سهى بشارة وتاريخها المشرّف، ويحكي بمنطق طائفي عن دير ميماس “شوفوا التعاون مع الاحتلال. هكذا يحدث في بلدة لا مقاومة فيها: إذعان وخنوع وإستسلام”، لعود واتذكر النص اللي كتبه لمرة واحدة حازم صاغية عن هروب أسعد بالاجتياح على صور وكيف كان عمبيتسبح بالبحر ويعمل برونزاج ومقابله كان في آلاف المعتقلين اللبنانيين والفلسطينيين على الشط نفسه.
اليوم جورج نكد بعدو مع الناس متل عادته ما ترك النبطية وعايش تحت رحمة الغارات وبنفس الوقت تحت تهديد أسعد والجيش الإلكتروني لأنهم ما بيعرفوا إلا تهديد الناس والدعوة لقتلهم..
كل ضيعة بلبنان والجنوب هيي مهمة متل كل بيوتنا، ودير ميماس أولهم وجورج نكد هوي دمنا وروحنا .. وتهديد حياته من أسعد ورفقاتو بالجيش الإلكتروني لازم يتحول للقضاء لأنه ممنوع هيدا الاستهتار اذا ما بدنا نقول الإجرام
