أخباركم – أخبارنا
سرد الليلة غضبان على المفتي الجعفري الشيخ أحمد قبلان يلي اعتبر أنّ “الحكومة عمياء وتكاد تكون متواطئة”.
وكل ما حدا بيحكي عن حصر السلاح، بيقول عنّن “عملاء”.
يا حبيبي… دور على العملاء ببيتك.
لا وبيقولك إنّ “المقاومة نص عمر لبنان”، وشطبها يعني شطب تاريخ البلد.
قول والله يا شيخ، شو هالتاريخ يلي كلّه غدر وخيانة؟
🔴 بخبرك عن إقليم التفاح، عن حرب الإخوة، وعن الخيانات يلي عطبت آلاف الشباب بضربة بيجر وقتلت أمينين عامين لحزب المقاومة “حزب الله”.
🔴 بخبرك عن شهداء ١٤ آذار.
🔴 بخبرك عن مؤسس جبهة المقاومة الوطنية جورج حاوي.
🔴 بخبرك عن سهيل طويلة يلي قتله عمادكم الحاج رضوان.
شو بدي خبرك لخبرك…
وقال قبلان إنّ “لبنان ما بينحكم إلا بالطبخة الوطنية الهادئة”.
من كتر ما هالمقاومة ما حكَّمت فينا الفساد راح الحكم، والوطن كاد يضيع عَ شوي… بتتذكر كم سنة خليتونا بلا رئيس؟
جندي: غبار وعسكر وبيارق، الكجك أحمد حاصر المغارة.
شيخ خاطر: كيف عرفوا إنو المير بمغارة جزين؟
الأمير فخر الدين: الخيانة يا شيخ خاطر، الخيانة بتهد الرجال، وبتنهي الأبطال، وبتضلّى جوعانة…
(مسرحية فخر الدين – الأخوين رحباني)
بس فشرتوا… بطلنا ما بينتهي ولو كنت خاين شاطر.
بتعرف شو عمل مبارح إنت وعم تتهمه بالخيانة؟
قرر يرجّع الدولة الحرّة، وليكون فيها سلام… على اسمه: السلام.
#بطلنا_نواف_سلام
