أخباركم – أخبارنا
قال رئيس الجمهورية العماد جوزاف عون، خلال استقباله وفداً من نقابة المحررين، إنّ:
“بعض اللبنانيين الذين يقصدون الولايات المتحدة يبخّون سمّاً على بعضهم البعض.”
وأضاف أنّ:
“بعضهم لا يرحمون حتى أنفسهم”،
مشددّاً على أنّه:
“يجب أن تقول للأميركي الحقيقة كما هي لا كما يحب أن يسمعها فهو يقتنع عندئذٍ.”
فخامة الرئيس يمكن يكون معك حق ويمكن لازم نحكي لغة وحدة المشكلة بهالبلد انه كل واحد بيظن انه هو الحق طيب ليش ما كلّكم بتعمموا حقائقكم علينا ونحن كلن على طريقته شي بيعمل مسبحة وشي بيعمل خيرة وشي بيعمل “حِكرة بكرا قلي ربي عزّ للعشرة” وبيختار شي حقيقة..
فخامة الرئيس في حقائق ما بيختلف عليها شخصين بالعالم الدولة “ رأس” يعني سلطة يعني حكم يعني “ حصرية سلاح فعلية ولو بحمام دم “ بين أنه يقتلهم الإسرائيلي ويقتلنا كلهم معهم أنا بفضل الدولة تبعي يعني ام الكل هي يلي تعملها مرة وللأبد”.
هلا إذا ما فيك او ما بدك او يمكن ما بتقدر هيدا موضوع تاني طيب كون منسجم مع حالك وخبرنا ياها بصراحة فخامتك انت عارف انه نحن بالموقع منحبك ووثقنا فيك وكنا اول مين رشحك بمقال لزميلنا السابق جورج حايك يومها لمن طلبت من جورج يكتبها قلي ولو اشبك شيء قلت له اكتبها لو سمحت وخلي الوقت يقرر يومها بحق العشرة والصحبة كتبها وكرت كرة الثلج طيب شو صار بعد ما تم انتخابك سامحني على السؤال ليش “إجر بالبّور وإجر بالفلاحة” بتعرف انه ترددت وفكرت كتير فخامتك قبل ما صارحك خفت ما صير من هول يلي ببخوا سم يعني “حية”.
فخامتك نحن الناس العاديين يلي خسروا أموالهم وخسروا حياتهم وعايشين على الامل اكتر ناس بيكونوا مبسوطين إذا بتنجح . طبق فخامتك خطاب القسم قوي قلبك وهجوم ويلي ما عجبه يخبط رأسه بالحيط ومش لازم نموت كلنا إذا قرر الشيخ نعيم وربعه يموتوا خليهم يجتمعوا بشيء مخيم ويكبوا على حالهم بنزين وينتحروا لوحدهم نحنا بدنا نعيش والحياة بتلبق لنا كلبنانيين.
وفوق كل هيدا، فخامتك انت رأس الدولة وانت ومجلس الوزراء بتقرروا إذا لبنان بدو يفاوض الشيخ نعيم إذا ما عجبوا هالكلام يقدم عبر كتلته النيابية استجواب للحكومة او وزارائه يحتجوا ويمكن يفلوا من الجلسة وشو عليه فخامتك يفلوا ما هي الديمقراطية ناس بتحكم وناس بتفل واصلاً الشيخ نعيم ما فيه ياخد محلك، وخليه يحل عنك ويتركك تحكم حاج كل يوم والثاني بيطل علينا وبيقلنا شو لازم وشو مش لازم نعمل “ شو دخلوا بربنا .. مين نصبوا حاكم علينا “ . لا وقال ما بيسلم السلاح ليظهر المهدي عجل الله ظهوره وبلكي هو مش مستعجل شو منعمل نحنا يعني لازم نموت .. إيه لا ما حزرت يا شيخ نعيم، روح موت لوحدك… نحنا بدنا نعيش.
وماذا جنينا يا أمّاه حتى نموت مرّتين: مرة في الحياة ومرة في الموت؟
هالقد وبس
