أخباركم – أخبارنا
كتب ماهر عواد عبر صفحته للتواصل الاجتماعي …
لما كنت بالجامعة بإيطاليا..كان معي بالكلية صبية صهيونية من أريحا..طالبة عادية..متل أي طالب من أي دولة بالعالم..مستوى أكاديمي عادي..مستوى مادي عادي..الفرق بينها وبين الباقيين إنها كانت جايي ع ايطاليا بمنحة دراسية على حساب دولتها..الدولة العبرية!
هل صبية اللي كنا أنا وياها عنا شعور متبادل بين بعض اللي هو الكره وعدم القبول من الطرفين…تخرجت بال٢٠٠٦ (كانت عم تحتفل مع أهلها بالتخرج بينما كانت الحرب على لبنان على أشدها) وأنا كنت موجود بالحفل لأنو كنا ملزمين بالحضور..
تخرجت هل صبية من هون..وضبت كلاكيشها ورجعت على بلدها من هون…تزوجت سنة ال٢٠٠٧ من زميل لإلنا من الكلية تخرج قبلها بسنة من نفس الجامعة..جامعة بولونيا Alma Mater Studiorum واللي هي أقدم جامعة بالعالم..وصار عندهم ولدين…
من كم يوم لفتلي نظري تعليق لإحدى زميلاتنا الطليان على صورة منزلتها هل زميلة الصهيونية : إبنها البكر تخرج من المدرسة وتم قبوله بMIT (ماساشوستس إنستيتيوت اوف تكنولوجي) أعرق وأفخم جامعة بالعالم…واكيد هيدا الصبي مش رايح على حسابو لأن هيدي الجامعة بتكلف ثروة، إنما رايح على حساب دولتو..وهي عم تتشكر دولتها وتدعيلها بطول العمر والرفاهية والرخاء لما تقدمه لشعبها في مجال العلم والتعليم…
منبرم الكاميرا لهون على لبنان…سنة ال٢٠٠٧، كمان صديق لإلي من مدينة صور،تعرفت عليه أثناء الخدمة الإجبارية..موظف بمؤسسة..معاشو مقبول..تزوج وصار عندو صبي..السنة تخرج من المدرسة…الصبي متفوق دراسياً…بسبب الظروف اللي عم يعيشها البلد..حصل على إفادة متلو متل أي حدا متسجل بالمدرسة…لما اتصلت فيه وعم إسألوا (بخبث) شو بدو يدرس إبنك بعد حصولو على الإفادة…قلي بخبث أعلى : “منا عارفين بعد والله..الصبي ضايع ونحنا ضايعين أكتر..بس مش مهم..المهم إننا منتصرين!”
تعليقاً على منتصرين : في شي بدي قولوا وأكيد ما رح يعجب الكتار بس I don’t care
طالما نحنا كل سنة منرجع ١٠ سنين لورا او يمكن أكتر بموضوع العلم والتعليم، بينما عدونا ماشي لقدام ما بيلتفت يمين ولا شمال وبيدعم العلم وبيعمل كل المطلوب ليطور شبابو..بعمرنا ما مننتصر عليه…بدون علم…خليك عم تاكل وتشرب وتأرغل بس ما تحلم بالنصر..خاصة إذا كان عدوك عم يخرج قادة من أعرق الجامعات بالعالم ونحنا تلات ارباع المسؤولين عنا ما بيعرفوا الألف من العصا…رئيس الوزراء الإ.س.ر.ا.ئ.ي.لي الحالي (بيبي) معو Double Major واحدة بالهندسة المعمارية من MIT وواحدة بالعلوم السياسية من Harvard وبعدك عم تحكيلي بإنتصار؟!
..نحن بزمن العلم والتكنولوجيا يا سادة..مش بزمن التشجيع والشعارات الفارغة والإنتصارات الإلهية اللي صرلنا سنين منحكي فيها ولكن ما شفنا منها شي.
