أخباركم – أخبارنا
كتب سلمان وهبي على صفحته للتواصل الإجتماعي فيسبوك برحيلها تكون قد طويت صفحة ناصعة من صفحات تاريخ كفررمان العظيمة
انا اتذكر…إحدى القصص من عشرات القصص عن ام محمد و جمول…
في احدى ليالي الربيع ابان الاحتلال قبل منتصف الليل بقليل دقيت الباب الخلفي لبيت الاستاذ علي ضاهر ردت ام محمد مين؟ قلت حسن كامل …فتحت الباب اهلا وسهلا شو وحدك …اي وحدي …نده الاستاذ علي من غرفته مين ردت ام محمد هذا حسن كامل قلها خليه يجي لعندي فتت عغرفة الاستاذ وكان يتهيء للنوم وقلي اهلا وسهلا بالاوادم قلتلو عم تخجلنا ياستاذ انتو هيك ربيتونا ضحك وقلي انت من ريحة الحبايب وأن شالله ماحدا شافك انت وجايي قلتلو لا ابدا قالت أم محمد هلق وصلت أو من زمان بالضيعة قلتلها هاي وصلتي جبنا شوية دعم للشباب وخبيناهن بمكان مؤقت لنشوف وين بدنانحطهن حتى الشباب يستلموهن …قالت أم محمد يعني كم يوم صرلك ماشي قلتلها من شي ٣ ايام …يعني بتكون بعدك على لحم بطنك …ياغادة سخني شوية مي صرلها الكهربا جمعة مقطوعة لازم يتحمم ويرتاح بكون انا حضرت شي للاكل وهكذا كان…قالت أم محمد بدك تشوف حدا ببعت غادة أو انا بروح …قلتلها الصباح رباح…في الصباح قلتلها لازم شوف ابو علي جواد ضروري …راحت ام محمد عملت صبحية لبيت ابوعلي جواد ورجعت معو عالبيت خبرت ابو علي جواد بمكان السلاح بالميذنة بقلب العليقة عكعب بساتين ابو وهيب بالزاوية من صوب المعدية اللي بتقطع خط التابلين…قال بسيطة… بكرا بروح انا والنسوان امك ومرتي وام خالد وام حاتم عالميذنة بالتراكتور والتريلا منجمع نقلة حطب ومنحط السلاحات تحت الحطبات وهكذا كان واتفقنا وين بدو يوقف التريلا حتى يقدرو الشباب ياخذوهن بسهولة …انتظرت حتى جاء الليل بعد ان اتطمنت على انتهاء المهمة بنجاح عدت ادراجي من حيث اتيت دون أن يشعر أحد بوجودي بالبلدة…
السلام والسكينة لروح ام محمد ولروح والمرحوم الاستاذ علي ولروح ابوعلي جواد والسلام لأرواح كل شهداء جمول وكل من سبقهم على هذه الطريق …
احر التعازي لنا ولابنائها ولكل محبينها والسلام …
